【花花回憶錄 (三)】側頭的「小霍金」，與尿頻背後的未解之謎

雖然花花成功企得返起身，但呢場大病都係喺佢身上留低咗痕跡——佢個頭變到側咗一邊。有時朋友見到，都會講笑話佢似「小霍金」。不過喺我心目中，無論佢個頭側成點，佢依然係昔日嗰個好靚女、好可愛嘅花花。

我哋一直有幫佢做舒緩按摩，花花嘅復康進度都幾理想，大部份時間都可以開心咁生活、自己行路。

不過，喺復康嘅過程入面，我哋發現咗一個隱藏問題：花花開始出現尿頻。佢經常急尿，身形亦慢慢消瘦。我哋帶佢去驗血做檢查，懷疑過係咪腎病，但每次出嚟嘅指數都幾好，當時搵唔到明顯原因。花花就快 15 歲，我哋唯有將呢個情況視為「老態」，覺得老人家多啲生理轉變都係自然嘅。既然暫時搵唔到根源，我哋就選擇接受，繼續開開心心咁陪佢生活。