惡性胃癌突發事件簿 (七)：痛在兒身痛在母心，與記憶中的中醫曙光

今日，見到你又成身震晒。我知道，你痛。

我好擔心你會因為痛楚，又再一次好緊張咁喺地下周圍爬，完全唔肯唞吓。為咗令你舒服啲，我唯有餵你食止痛藥。望住你，我個心真係好難受、好矛盾——我好想你好想你繼續生存落去，陪我耐啲；但同時，我極度驚你會痛、會受苦。

呢種精神上嘅拉扯，令到我都完全食唔落嘢，成個人心力交瘁。我個腦不停喺度糾結：究竟應該 keep 住用重藥去㩒住你個病情，定係應該由得你，痛住咁過得一日得一日？

喺呢段忙亂又無助嘅日子，我唯一可以做嘅就係不停上網 search，睇吓有咩方法可以幫到你。突然間，我腦海閃過以前「細佬」嘅畫面！當時細佬都面對住好嚴重嘅痛症問題，後來就係因為睇中醫、食中藥，成功緩衝咗嗰份痛楚！

我即刻諗起以前睇開嗰啲醫生，但名醫實在太難 book，加上強仔嘅情況太緊急、太嚴峻，我根本等唔切。喺不知所措之下，我只好周圍打電話，睇吓邊個中醫有位就睇邊個。皇天不負有心人，好好彩終於畀我 book 到一位中醫！我即刻帶齊第二位西醫嘅驗血報告同資料，準備去同中醫研究強仔嘅病情。