惡性胃癌突發事件簿 (五)：出門一小時的「屎」料不及與無聲的讚賞

捱過咗最艱難嘅頭三天，去到第四日，現實嘅考驗又嚟啦——我要開始返工。

前幾日我一直努力捉摸強仔嘅生活節奏、排泄規律同埋病痛發作嘅頻率，自以為已經好有頭緒。於是，我同自己定咗個「完美計劃」：朝早早啲起身同佢玩、落街行吓，等佢精神爽利之餘又消耗吓體力。我諗住，只要佢早啲攰，我返工嗰陣佢就可以舒舒服服咁瞓長覺啦

。

點知，你想歸你想，現實歸現實。

我出門口唔夠一個鐘，強仔就急屎了。佢好努力咁想自己撐起身，但偏偏後腳無力起唔到，最後……搞到全屋同一身都係屎。

返緊工嘅我一發現呢個情況，個心真係一沉。要返工，又要趕返屋企清潔，嗰種兩邊兼顧嘅吃力感真係難以形容。好彩公司非常體諒同彈性，等我可以趁午飯時間「偷走」趕返屋企。頂住炎熱嘅天氣跑入門口，第一眼就見到慘慘豬嘅強仔趴喺地下喘氣，一身都係已經乾咗嘅屎。

但我第一時間唔係嬲，亦無怪責佢。因為我知，呢個係我計算失誤，唔係佢嘅錯。 佢已經好努力嘗試去解決，所以我反而係咁讚佢：「叻仔呀！有屙屎屎，好叻呀！唔洗唔開心，亦都唔洗擔心，清潔好簡單㗎咋！」

因為喺冷氣房入面掙扎咗兩個鐘，強仔成身發熱，加上緊張，身體似乎又開始發炎。我第一時間畀啲水佢飲，安撫好佢嘅情緒。同時，我慶幸自己一直堅持用天然嘅清潔用品。如果喺呢個密封嘅冷氣空間入面，噴滿化學清潔劑，我趕住走之後，留低喺屋企慢慢吸入呢啲化學毒素嘅，就只有強仔一個。用天然用品強效清潔，起碼我行得安心，佢亦呼吸得安全。