惡性胃癌突發事件簿 (八)：老中醫的定心丸與退熱的小火爐

去睇中醫之前，其實我個心依然好沉重。因為頭兩位西醫畀我嘅回覆都係非常唔樂觀，叫我「好好有心理準備」。

但估唔到，呢位中醫老醫生，完全明白老人家（高齡狗狗）嘅身體反應。佢無講啲嚇人嘅說話，反而好輕鬆自在咁派咗粒「定心丸」畀我。佢話：「好啦，你都要有心理準備嘅，呢種狗種基本上都係去到 16 歲左右㗎啦。老狗要走嗰陣會好突然，你自己心裏有數。我哋依家睇吓啲藥，可唔可以幫佢撐多一年啦！」

嘩！「一年」！聽到呢個字，我個心簡直好似見到神仙打救咁，原本嗰種被判死刑嘅恐懼同重壓，即刻鬆晒！我好明白雖然呢個數字係一個支持，但係可以無痛生存多一日就已經好感恩了

不過，開心歸開心，回到現實，依然要見證藥效先敢放心。返到屋企，我又開始焦慮：停咗西醫嘅止痛藥，強仔會唔會痛到頂唔順？中藥係咪真係有效？但係，我相信緣份。既然上天安排我哋遇到呢位醫生，而醫生亦都好用心幫強仔，我無理由唔信佢。於是，我哋開始慢慢轉食中藥。

中藥唔係仙丹，唔會即刻見效。頭嗰七日，強仔個肚仔依然好似一個「小火爐」咁，一路發熱，摸到我心慌慌。

但我哋堅持住，慢慢經過三四日嘅調理，強仔肚仔嘅熱力真係開始減退！食咗一星期中藥後，我覆診同醫生講，強仔個肚仔上半部無咁熱啦，但下半部仲係有啲㷫。醫生聽完，好精準咁幫我調配過另一隻藥。

轉咗新藥之後，反應出奇地好！再慢慢食多三四日，強仔成個肚仔終於無咁熱，個「小火爐」終於熄咗啦！

望住你慢慢平伏嘅呼吸，摸住你無再發熱嘅肚仔，嗰一刻，我心入面只有兩個字：感恩。就算前面條路仲有幾多未知之數，最少依家呢一刻，你係舒服嘅。