惡性胃癌突發事件簿 (六)：浴缸邊的倔強與舔乾淨的罐罐

安頓好強仔嘅心情，抹好地，就到咗最艱鉅嘅任務——同佢沖涼洗 Pat Pat。

喺沖涼嘅過程中，我再次見識到強仔有幾聰明同硬頸。佢知道自己後腳無力起唔到身，亦知道媽媽有時做嘢心急會「粗心大意」，為咗防止自己喺浴缸跣低，佢竟然堅持用一隻腳死撐住個浴缸邊！望住佢嗰個倔強又可愛嘅姿勢，我真係忍唔住笑咗出嚟。好啦好啦，等急躁嘅媽媽幫你輕輕鬆鬆洗乾淨啲屎屎啦。

洗完白白，單手扶住佢又要幫佢吹毛，真係少啲少林功夫都搞唔掂。吹風機太熱怕焗親佢，太凍又怕佢冷親，嗰一刻真係深深體會到「做人阿媽甚艱難」。

終於捱到吹乾晒啲毛毛！因為要開始食止痛藥，一定要確保佢身體乾爽、舒服，先可以開罐罐畀佢食，幫佢補充返頭先掙扎流失嘅體力。

原本仲擔心佢會無胃口，點知…… 「𠽌𠽌𠽌……」開胃嘅強仔大啖大啖咁食！食呀食呀食，食到最後，竟然連個兜都舔到乾乾淨淨！

嘩！望住嗰個乾淨嘅兜，嗰一刻，頭先撲返屋企嘅大汗疊細汗、捽屎抹地嘅辛酸、吹毛嘅手忙腳亂……全部都一掃而空。呢一種巨大嘅滿足感，只有做家長嘅人先會深深明白。

唔緊要嘅強仔，我哋繼續努力。你依家舒舒服服、乾乾淨淨咁安睡啦，等媽媽放工返屋企，我哋再慢慢計劃接落嚟嘅路。