惡性胃癌突發事件簿 (十)：日以繼夜的過山車與被忽略的腦退化

陪佢轉完圈，見佢精神好返啲，呢兩個星期佢變得極度依賴、超級貼身。就好似一個啱啱學識行、跌跌碰碰嘅小朋友咁，時時刻刻都要黐實你、望住你、同你玩。初頭我都好開心，以為佢只係病好撒嬌。

但慢慢發覺……咦，反應好似有啲唔妥。點解夜晚完全唔瞓覺嘅？明明日頭玩得好開心，但去到夜晚依然眼光光，甚至全日都唔肯瞓！

呢個時候我先如夢初醒：原來佢嘅腦退化（認知障礙）嚴重咗！

回想返過去呢二十幾日，因為惡性胃癌突發，我將所有精力放晒喺點樣顧住佢個胃、幫佢止痛、同埋解決佢行唔到嘅問題（例如幫佢安排戰車仔、墊咕𠱸促進血液循環）。我以為解決咗身體上嘅痛楚就得，竟然完全忽略咗佢腦神經嘅問題，呢二十日停晒所有關於護腦嘅 Supplement。

結果，我哋又無奈地坐上咗另一架過山車。

為咗令佢夜晚有覺好瞓，我哋試盡各種方法：日頭盡量消耗佢體力、唔畀佢咁早瞌眼瞓，甚至特登頂到夜晚 11 點後先畀佢瞓，奢望佢（同我哋）可以一覺瞓到天光。

但現實係殘酷嘅，佢凌晨半夜依然會突然醒晒，扭計一定要出廳。面對住呢個日以繼夜嘅神經大作戰，望住半夜唔肯瞓嘅強仔，我哋真係好崩潰。「點算好？點算好？」無助嘅我哋，唯有又再一次打開電腦，瘋狂上網 search，尋找可以令佢安神嘅救命稻草……