惡性胃癌突發事件簿 (四)：黑色的便便與不屈的生命力

因為你堅持要自己解決，我返到屋企嘗試咗一兩次想幫你放屎，但都失敗收場。嗰晚，我個心真係好亂，亂到完全唔知點算好。因為你已經食咗藥，如果啲毒素同廢物一直困住喺條腸度排唔出嚟，其實同加重病情係無分別嘅。

我擔心咗成晚，亦觀察咗成晚。為咗再試下幫你，我將自己十隻手指嘅指甲全部剪到最貼肉、最平，因為我好怕會唔小心刮親你敏感嘅地方，令你唔舒服，甚至令你更加抗拒屙屎。可惜，無論我點樣小心翼翼咁試，你依然係唔肯妥協。

點知去到第二日，奇蹟竟然出現。

當你有急意嘅時候，你竟然主動爆發出一股力量，自己飆起身，跌跌撞撞咁行去哋屙尿同屙屎！

雖然，屙出嚟嘅屎係深黑色嘅……我知道，呢個係腸胃內出血嘅證明，情況依然嚴峻。但望住你就算身體虛弱到極點，每次急尿急屎都仲要出盡全力撐起身，堅持要靠自己解決嗰份努力，我心入面嗰種震撼真係難以形容。

強仔，你真係好叻、好有骨氣。既然你自己都咁努力，咁想撐落去，媽媽答應你，我哋都絕對唔會放棄！我哋一齊打呢場仗！