【花花回憶錄 (一)】最乖巧的天使，與那年新年最痛的遺憾

講起花花，心底裡總會泛起一陣無法平息嘅刺痛。

如果世界上有「天使狗狗」，花花一定係其中一分子。佢性格真係好討人喜歡，成日開開心心，對生活幾乎無任何苛刻嘅要求，極度親人。照顧佢，係一件好少感受到壓力嘅樂事。佢唔似得強仔咁矜貴、要求多多又難服侍；花花好叻，每餐都乖乖地自己食，食得好滿足，大小便又會自己去返正確嘅位置。佢底子算好，適應天氣嘅能力都幾高。

一隻咁惹人錫、咁容易打理嘅狗狗，我真係好心痛，點解最後會經歷一個咁令人心碎嘅劫難。

🌑 2024 年農曆新年：一個後悔莫及的決定

事發喺 2024 年嘅新年。當時我一心諗住，新年流流，不如俾花花返去主人身邊，等佢哋可以開開心心咁團年。初一前，我哋親自帶住精神活潑、仲會周圍跑跑跳跳嘅花花同強強入去交俾佢前主人。

點知呢個決定，成為咗我最痛嘅遺憾。

原來前主人將狗狗接返去之後，自己就上咗大陸玩，淨低花花、強仔同工人姐姐留喺屋企。嗰幾日天氣突然轉得好凍，花花唔知係咪因為食嘢心急得滯而嘔吐。面對狗狗唔舒服，佢哋嘅處理手法竟然係停止餵食；更甚嘅係，可能因為花花有尿頻嘅情況，工人姐姐為咗貪方便，竟然連水都唔俾佢飲

其實如果有瀨尿問題，幫佢著尿片就可以解決，點可以連生存最基本嘅水都剝奪？但當時主人唔喺身邊，根本無人在意呢條小生命嘅安危。

🌑 僅餘的力氣，只為走向最疼愛她的人

短短四日後，我哋去接佢哋。一入屋，我見到花花瑟縮喺一張櫈底。當時我完全無為意事態嚴重，仲以為佢只係匿埋。當叔叔行埋去，花花用盡全身僅餘嘅力氣，掙扎著行向叔叔身邊。叔叔第一時間抱起佢，而我就抱住強仔。我哋當時仲天真咁諗住帶佢哋落樓下去個洗手間，然後搭的士舒舒服服咁返屋企。

直到叔叔將花花放落地下嗰一刻，我哋個心徹底沉咗落去——花花已經四腳完全無力，根本連企都企唔起身。

我哋即刻飛奔去睇開嗰間獸醫診所搵靚女醫生急救。檢查結果令我直頭想崩潰：花花嚴重缺水，情況非常危險。

🌑 散不去的怒火與長存的思念

而家已經係 2026 年嘅夏天，花花亦都喺 2025 年 5 月去咗彩虹橋。

事隔兩年有多，但當日急症室嘅情景、花花無力癱軟嘅身軀，依然歷歷在目。

呢件事傷得我好深，但花花留低嘅痛，亦令我更加堅定，要用盡全力去守護每一個交託喺我手上嘅生命。