惡性胃癌突發事件簿 (九)：暈陀陀的轉圈舞與生命的堅持

大家有冇想像過，如果自己明明起唔到身，但都硬係要靠自己企起身，仲要轉十幾個圈先肯屙屎，會係一個咩畫面？

強仔就係咁。佢嘅生命力真係強到令人佩服。雖然佢中過風，有一隻後腳緊咗、僵硬咗，平時根本好難自己起步，但佢份人真係好有骨氣、好堅持。佢硬係要自己行，就算只係行幾步，都要靠自己；甚至急起上嚟，一定要自己撐起身去屙尿、屙屎。

最攞命嘅係，佢有一個根深蒂固嘅習慣：每次屙屎屙尿之前，一定要不停自我轉圈。轉吓、轉吓、轉吓……每次起碼轉 10 至 15 個圈以上先肯「發射」！

面對住一隻腳跛、企都企唔穩，但又堅持要轉圈嘅老人家，大家會點做？

我就選擇咗「寵壞」佢——我陪佢一齊轉。我會用雙手傍住佢，佢轉一個圈，我跟住佢轉一個圈。有時轉到我自己頭都暈埋，但望住佢，我個心係開心嘅。

因為我一直深信，亦都係我養過五隻狗狗嘅堅持：我必須尊重佢哋每一個諗法。 只要佢仲有自己嘅執著，仲想按自己嘅方式去生活，就代表佢仲有強大嘅生命力。尊重佢嘅選擇，就係滋養佢靈魂最好嘅養分。