惡性胃癌突發事件簿 （二)：急症室的無力感與我的承諾

等到夜晚 11 點多，終於見到醫生。如果真係要喺 3 小時黃金時間內解決，我相信好多生命已經等唔到。

一入去，醫生睇見你個情況，就話可能有惡性胃癌引發，要求先驗血睇報告。但驗完血出嚟，面對住份報告，醫生竟然喺度「咿咿哦哦」。佢話打水有風險，做呢樣又怕有意外，揸住份報告望嚟望去，似係自己同自己講嘢，多過同我解釋。

面對咁嚴峻嘅生死關頭，我真係顧唔上禮貌，直接打爛沙盤問到篤。我怕我聽唔清楚、了解錯咗，會斷送咗強仔條命：「究竟係咩事？係胃癌？係中暑？定係熱衰竭？點解份報告只係反映到有嚴重發炎同少少缺水？依家有咩可以做？」

我嘅邏輯好簡單：缺水就打水，無血就輸血，無營養就吊營養。救命就係要喺短時間內補充身體需要嘅嘢去做緩衝。可惜，醫生似乎完全無 idea。見到嚴重發炎，叔叔主動要求：「不如打消炎針啦？」醫生量完血壓，先勉強同意幫你打。打完針，你個身依然㷫，但總算好過無。

最後，醫生淡淡然拋低一句：「如果狗狗喺陌生環境離開會好緊張、好孤伶伶，你哋選擇帶走就好啦。」

其實，我由頭到尾都無諗過要留你喺醫院。就算發生咩事，我都會帶你返屋企。我寧願親手緊緊抱住你，都絕對唔會將你獨自留喺一個完全唔認識、冷冰冰嘅地方。

返到屋企，你似乎感覺到自己返到安全嘅避風港，精神稍微「翻生」咗少少，有飲水，亦有食少少嘢。雖然你依然極度疲累，甚至可能仲未意識到自己已經行唔到。

行唔到？唔緊要，就等媽媽嚟照顧你。 接下來，就係 24 小時全天候嘅陪伴。每兩個鐘飲一次水，每兩個鐘食一次野, 每兩個鐘食一次藥。

強仔，唔洗驚，你嚟啱咗地方啦，媽媽喺度。